1. Krisiari eta langabeziari AURRE EGIN, jarduera ekonomikoa eta merkataritza sustatuz.
Udal Elkartearen ekimena bultzatuko dugu, Urola Kostan jarduera ekonomikoaren benetako motor instituzionala izan dadin. Langabetu eta ekintzaileen laguntzak hobetuko ditugu eta, Eusko Jaurlaritza eta Foru Aldundiarekin elkarlanean, industri-ehuna piztuko dugu, Errotaberriko poligonoaren urbanizazioarekin.
2. Giza-babeserako sistema JASANGARRI ETA KALITATEZKOAREN aldeko apustua.
Gastu soziala indartuko dugu, pertsona eta kolektibo ahulenei zuzendutako zerbitzuak eta arreta bermatuz, eta dirulaguntzak eta programak modu eraginkorrean kudeatuz: hirugarren adinekoak, behar bereziak dituzten pertsonak, premia egoeran dauden familiak, adin txikikoak...
3. Zarautzek bizi duen geldialdi egoerari amaiera eman, eta proiektu estrategikoak BERRESKURATU.
Inbertsio publikoaren aldeko apustu garbia egingo dugu, une honetan geldirik edo blokeatuta dauden proiektu estrategikoak bultzatuz. Zarautzen saihesbidea egiteko
proiektua bideratuko dugu. Santa Klaran, trenbidean oinezkoentzat azpiko pasagune berria jarriko dugu martxan, eta Itxasmendi auzoko sarreran biribilgune eta zubi berriak aurreikusiko ditugu.
4. Eraginkortasuna, GOBERNU ONA eta gardentasuna.
Herritarren Arreta Zerbitzu berria finkatuko dugu, udaletxean egin beharreko tramiteak azkartuz eta erraztuz. Herritarren eskaera eta kontsultei 48 orduko epean erantzuteko konpromisoa hartuko dugu. Gardentasuna bultzatuko dugu udal kontratazioetan.
Kudeaketa Plana onartuko dugu legealdiko lehentasun estrategikoekin, eta Planaren betetze-maila ebaluatzeko mekanismoekin.
5. Udal instalazio, azpiegitura eta ZERBITZUAK HOBETZEKO egitasmoak.
Herriko kale eta plazen garbiketa hobetu eta areagotu, segurtasuna handitu, hondakinen gaikako bilketa eraginkorra bermatu atez atekorik gabe, errepide eta espaloiak berritu eta konpondu, udal eraikinetan energia aurrezteko neurriak hartu, eta auzoen beharrei erantzun arinagoa eta hobea eman.
6. ZARAUTZEN bizi ahal izateko aukera bermatze aldera, 2015- 2020 egitasmoa abian jarri.
Aldapetako 60 etxebizitzak aurrera ateratzeaz gain, konpromisoa hartzen dugu publikoki 2015-2019 legealdian beste 100 babestutako etxebizitza berri martxan jartzeko. Etxe ‘hutsen’ zergaren errekargua berrikusiko dugu alokairuari eta familia ugariei hobariak eskainiz, eta hutsik dauden etxebizitzen merkaturatzea bultzatzeko neurriak hartuko ditugu.
7. Aparkaleku faltari aurre egiteko KONPONBIDEA.
TAO sistema berraztertuko dugu. Azken Portu Goian trafikoa berrantolatuko dugu aparkaleku gehiago lortzeko. Udan bisitatzen gaituztenontzat aparkaleku bereziak aurreikusiko ditugu, eta ezgaituentzat plaza gehiago gordeko ditugu.
8. Mugikortasun JASANGARRI ETA SEGURUA.
Oinezkoen segurtasuna bermatzeko eta oztopo arkitektonikoak murrizteko neurriak hartuko ditugu. Autobus urbanoaren zerbitzua hobetuko dugu hobariak eskainiz, eta ordutegiak eta ibilbideak eskarien arabera egokituz. Bide heziketarako kanpainak jarriko ditugu martxan. Bizikletero gehiago.
9. Kultur jarduerak eta euskara BULTZATU.
Elkarlanean arituko gara Zarauzko elkarte eta eragileekin, Musika Eskola finkatu eta hobetzeko, euskaltegiko eta liburutegiko zerbitzuak indartu eta modernizatzeko, ikastaro eskaintza zabaltzeko, edota ditugun instalazioak hobetzeko: Villa Munda, Gaztegunea, Modelo... Formakuntza bultzatuko dugu.
10. Kirola, turismoa eta aisialdia, Zarautz ERAKARGARRIA.
Lizardi institutuko pista estaliko dugu. Asti epe ertain eta luzean garatzeko Plana onartuko dugu zelai berria eta atletismo pista aintzat hartuta. Kirol eta aisialdi ospakizun eta jarduerak babestu, eta kalitatezko turismo eredua ezarriko dugu.
