EGITASMOA
1 # Hirigintza Plan Berria garapen iraunkorra ahalbideratuz
Herriko etxebizitza, mugikortasun eta peatonalizazio beharrei erantzungo diena, espazio publikoak irisgarritasun arauetara egokituko dituena eta ekipamendu berrien hornikuntza jasoko duena.
2 # Elizateei bultzada emanez
Landa ingurunea mantentzeko inbertituko dugu eta eskoriatzar guztion gozamenerako auzo bideak berreskuratu. Lehen sektorea lagunduko dugu eta biomasaren erabilera aztertuko herriko baso baliabide jasangarrietatik abiatuta.
3# Auzoetaz ahaztu gabe
San Pedroko goiko aldea eta Santa Anarekin duen lotura berrurbanizatuko ditugu eta Bidebarrietako ibilbidea berreskuratuko dugu. Intxaurtxuetako amaitu gabeko urbanizazioari irtenbidea aurkituko diogu eta herriko lan txikien plana abian jarriko dugu herritarren eskariei erantzun emanez.
4# Eta garapen ekonomikoan lagunduz
Lur industriala kontsolidatuko dugu etorkizunean enpresen ezarpena bermatzeko. Eskualdeko Garapen Agentziaren bitartez, eta Eusko Jaurlaritza eta Foru Aldundiaren laguntzez baliatuz, gure gazte ekintzaileak babestuko ditugu eta herriko enpresen kontratazioa bultzatuko dugu.
5# Zaborren arazoa konponduko dugu
Atez atekoa garestia da, zikina eta ez du funtzionatzen. Bostgarren edukiontzia da irtenbidea. Hondakinak hoberen sailkatzen dituzten herritarrentzat hobariak ezarriko ditugu eta baita itzultzeko bilgarriak erabiltzen dituzten dendei ere. Inposaketarik gabe.
6# Eta kiroldegiko eskaintza hobetuko dugu
Ekintzak erabiltzaileen eskaeretara egokituko ditugu kirol taldeen parte hartzearekin. Instalakuntzen mantenu egokia eta kudeaketa profesionala bermatuko duten enpresak kontratatuko ditugu.
7# Herriko dendak babestuko ditugu
Eskoriatzarren kontsumo ohiturak aztertuko ditugu herriko komertzioa babesteko plana garatzeko eta bertako kalitatezko produktuen ekoizpena eta kontsumoa bultzatuko ditugu, auzoetan eta elizateetan feriak antolatuz.
8# Inposaketarik gabe
Eskoriatzar guztientzat gobernatuko dugu, elkarte ezberdinekin harremanak sortuz eta baita udaletxera hurbiltzen diren guztiekin ere. Elkarte eta herritar guztien ekarpenekin osaturiko kultur agenda prestatuko dugu.
9# Arazo gehien dutenekin ahaztu gabe
Etxebizitza hutsak alokairuan ematea hobariekin lagunduko dugu eta fiskalitate positiboa bultzatu zailtasunak dituzten pertsona eta familientzat. Gizarte laguntzen jasotzaileentzat lan komunitario formulak aztertuko ditugu.
10# Dena gure hizkuntza oinarri hartuta, euskarari dagokion lekua emanez
Mundura zabalik dagoen herri euskaldun baten aldeko apustua egiten dugu, herritarren artean dugun aniztasun kulturala aintzat hartuta eta gure sema alabak arro sentitu daitezen.
